02:59 am - Friday 18 April 2014

Canada yokeje igitutu Mugesera avuye mu bitaro ngo aze mu Rwanda

By Patrick Muneza - Mon Jan 16, 9:16 am

Léon Mugesera .

Léon Mugesera ukekwaho kugira uruhare muri Jenoside yakorewe abatutsi mu Rwanda, nyuma yo kuva mu bitaro ku wa Gatandatu nimugoroba yahise yongera gutabwa muri yombi muri Canada.

Umuvugizi w’urwego rushinzwe imipaka muri Canada yavuze ko Mugesera yatawe muri yombi nyuma yo kuva mu bitaro byo mu mujyi wa Québec akaba ndetse yarahise ajyanwa ku cyicaro cy’uru rwego rushinzwe imipaka i Laval, mu majyaruguru ya Montreal.

Umuyobozi wo mu rwego rwo hejuru hariya muri Canada yatangarije ikinyamakuru Toronto Sun ko Mugesera, w’imyaka 59 y’amavuko yafatiwe mu bitaro, ahari hari umugore we, abana be ndetse n’umwunganizi we imbere y’amategeko.

Umuvugizi w’uru rwego Esme Bailey yatangaje ko ifatwa rya Leon Mugesera rizasesengurwa n’urwego rushinzwe abinjira n’impunzi muri Canada.

Mugesera, kugeza ubu ukurikiranyweho kugira uruhare mu gushishikariza interahamwe gukora Jenoside yakorewe abatutsi mu Rwanda muri Mata 1994, byari biteganyijwe ko yoherezwa mu Rwanda kuhaburanishirizwa ku wa Kane w’icyumweru twaraye dusoje ariko nyuma yaje kujyanwa mu bitaro igitaraganya, habura amasaha macye ngo yoherezwe mu Rwanda.

Inkiko zo mu gihugu cya Canada zivuga ko ku itariki ya 22 Ugushyingo 1992, Mugesera yakanguriye abahutu kwanga urunuka no kwica Abatutsi, mu ijambo yavugaga nka visi perezida wa MRND, aho yavugaga ko abatutsi ari inyenzi agasaba bagenzi be b’abahutu kwica abatutsi babaroha mu migezi wo mu Rwanda.

 

Ferdinand Uwimana

Have Your Say

Comments are closed on this post.