08:45 pm - Friday 18 April 2014

Perezida wa Guinea-Bissau Malam Bacai Sanha yitabye Imana

By Patrick Muneza - Tue Jan 10, 9:41 am

 

Nyakwigendera perezida wa Guinea-Bissau Malam Bacai Sanhá

Perezida wa Guinea-Bissau Malam Bacai Sanha  yapfiriye mu bitaro by’i Paris nk’uko Radio y’igihugu yabitangaje.

Ibi byabaye kuri uyu wa mbere tariki ya 9 Mutarama 2012.

Uyu mugabo wari ufite imyaka 64 yabaye Perezida mu 2009, yari yarajyanywe mu Bufaransa mu Gushyingo ubwo yari yarembye bikabije.

Indwara yari arwaye ntiyigeze ishyirwa ahagaragara ariko yari azwiho kurwara indwara y’igisukari (diabetes) aho yajyaga ayivuriza mu bitaro mu gihugu cy’igituranyi cya Senegal.

Yapfiriye mu bitaro bya gisirikare bya Val de Grace mu Mujyi wa Paris.

Kuva yaba Perezida, yakunze kurangwa no kujya kwivuriza hanze y’igihugu cye. Uwo yasimbuye Joao Bernardo Vieira we yishwe n’ibitero yagabweho n’abasirikare batavugaga rumwe na we.

Iki gihugu cyo muri Afurika y’Uburengerazuba mu minsi ishize cyararanzwe ahanini na kudeta kuva cyabona Ubwigenge mu 1974 ndetse cyabaye icyambu cy’ibiyobyabwenge bivanwa muri Amerika y’Epfo bijya mu Burayi.

Mu Kuboza nibwo uwayoboraga igisirikare kirwanira mu mazi Jose Americo Bubo Na Tchuto, yafashwe ashinjwa gufata ubutegetsi ubwo Sanha yari mu bitaro.

 

Florent Ndutiye

Have Your Say

Comments are closed on this post.